2019-09-19
Leioako Udaltzaingoak lehortze prozesuan zegoen marihuana plantazioa aurkitu du Leioan hutsik dagoen eraikin batean
Leioako Udaltzaingoak Peruri auzoan hutsik dagoen eraikin baten barruan lehortze prozesuan zegoen marihuana plantazioa aurkitu zuen atzo. Guztira, 22 kilo inguruko plantazioa da eta merkatuan 28.000 euroko balio izango zuena.
Zonaldean lan egiten zuen herritar batek deitu zuen Udaltzaingora eraikinetik ateratzen den usainaz ohartarazten. Agenteak bertaratu zirenean, eraikineko hainbat gelatan banatuta aurkitu zituzten landareak eskegita, lehortze prozesuan.
Eraikin hau, komentua izan zen eta gaur egun hutsik dago eroslea aurkitu arte, beraz baldintza egokiak biltzen zituen holako ekintza baterako. Sarrerako segurtasun neurriak (giltzarrapoak…) ondo aurkitu dira, beraz, teilatutik sartu izan direla uste du Udaltzaingoak.
Egileak nortzuk izan ziren ikertzen jarraitzen du Leioako Udaltzaingoak.